讓人感到可恥的...

其實，我都可以話係關閘過關的常客；
但請注意：
我只係會成日去拱北食野，有時會行下街買下野；
絕對唔係「車仔黨」。（我諗識我的人都會明白乜叫“車仔黨”）

每次當我搭巴士的時候，
都會見到一個只有澳門經常都會有的現象→就係上巴士唔排隊，
見有車來到就即刻「打尖」。
通常會做出呢種行為的人，都係「師奶級的阿姨」或者係「中年的阿叔」，有時會係「好惡的阿婆」；唔知係唔係因為佢地覺得自己的年齡有咁上下，認為我地呢ｄ做細的年青人，要尊敬下佢地，讓佢地「打尖」。

坦白講句，我唔介意人多，亦唔會介意有位坐；
只係唔鍾意見到呢ｄ似老賣老的人。
我覺得Janet講呢句話好啱聽：「年紀大唔使排隊咩？」

不過，我估係其他人眼中，會覺得我（地）好惡，好似一個年青人讓ｄ“老人家”行先都唔得；（因為有時候，我地會大聲咁講：如果真係老到行唔到，佢地點解咁有衝勁去同守規的人爭鬥呢？）

如果俾香港或者係外國遊客見到，你地估下佢地會點睇澳門人呢？我自己會覺得有點“可恥”；一個都可以稱得上為「旅遊城市」既地方既居民，竟然公民意識係咁差...